అమరావతి నవంబర్-1(మాతెలంగాణ బ్యూరో):

ఆంధ్రప్రదేశ్‌లో అత్యంత ఉత్కంఠగా ఎదురుచూస్తున్న పట్టణ స్థానిక సంస్థల ఎన్నికల పోలింగ్ ప్రశాంతంగా ముగిసింది. ఆదివారం ఉదయం 7 గంటలకు ప్రారంభమైన పోలింగ్ సాయంత్రం 5 గంటల వరకు కొనసాగింది. 5 గంటల సమయానికి క్యూలైన్లలో నిలబడిన ఓటర్లందరికీ ఓటు వేసే అవకాశం కల్పించారు.రాష్ట్రవ్యాప్తంగా 13 మున్సిపల్ కార్పొరేషన్లు,79 మున్సిపాలిటీలు,నగర పంచాయతీలు - మొత్తం 92 పట్టణ స్థానిక సంస్థల్లో ఎన్నికలు జరిగాయి.8 చోట్ల ఇప్పటికే ఏకగ్రీవం కాగా, మిగిలిన చోట్ల పోటీ హోరాహోరీగా సాగింది. ఈ ఎన్నికల కోసం 99.36 లక్షల మంది ఓటర్లు, 11,378 పోలింగ్ కేంద్రాలు, 10,262 మంది అభ్యర్థులు బరిలో నిలిచారు.అభ్యర్థుల భవితవ్యం ఇప్పుడు బ్యాలెట్ బాక్సుల్లో నిక్షిప్తమైంది.నవంబర్ 3న ఓట్ల లెక్కింపు చేపట్టి ఫలితాలు వెల్లడించనున్నారు.

*నగరాల్లో మందకొడి, పల్లెల్లో జోరు!*

ఈసారి పోలింగ్ సరళి ఆసక్తికరంగా సాగింది. ప్రధాన నగరాల్లో ఓటర్లు నిరాసక్తత ప్రదర్శించగా, చిన్న పట్టణాల్లో మాత్రం ఉదయం నుండే పోలింగ్ కేంద్రాలకు పోటెత్తారు.రాష్ట్ర ఎన్నికల సంఘం ప్రకారం మధ్యాహ్నం 3 గంటల వరకు రాష్ట్ర సగటు 48.03% గా నమోదైంది. కర్నూలు జిల్లా గూడూరులో అత్యధికంగా 83.6% నమోదు కాగా, విశాఖ జీవీఎంసీ లో అత్యల్పంగా 39.74% మాత్రమే నమోదైంది. విజయవాడ 41.80%, గుంటూరు 40.99%, తిరుపతి 42.12% గా ఉంది.

*చెదురుమదురు ఘటనలు:*

ఒంగోలులో టీడీపీ, వైసీపీ కార్యకర్తల మధ్య స్వల్ప ఘర్షణ జరిగింది. కొన్ని చోట్ల అక్రమాలు జరిగాయని, రీపోలింగ్ నిర్వహించాలని వైసీపీ డిమాండ్ చేసింది. మరోవైపు పాలకొండలో ఓ నవ వధువు పెళ్లి దుస్తుల్లోనే వచ్చి ఓటు వేయడం అందరినీ ఆకట్టుకుంది.విజయవాడ 55వ డివిజన్ లో బ్యాలెట్ గుర్తులు తారుమారవడంతో పోలింగ్ ను రాత్రి 7.45 వరకు పొడిగించారు.మొత్తంగా పోలింగ్ ప్రశాంతంగా ముగియడంతో అధికారులు ఊపిరి పీల్చుకున్నారు.